Dato: 2024-10-31
Stad: Trondheim
Type: Velgjerd
Kostyme: Stormtrooper
Trooparar frå Norwegian Garrison og kadettar frå Luftkrigskulen besøkte barneavdelinga på St. Olavs hospital på halloween. Vi prata med ungane, delte ut godteri og stilte opp på foto med dei.
Eg har hatt lyst til å delta på dette arrangementet i årevis, men har ikkje hatt høve før no. Dette er ein av dei mest meiningsfylte oppdraga vi gjer, så eg er glad for at eg endeleg fekk ta del i det sjølv.
Barnekreftforeningen Trøndelag har lagt ut fleire bilete på Facebook-sida si.
Turen ned til Trondheim var ikkje problemfri. Planen min var å ta nattoget ned, vere heile dagen i byen, kanskje få unnagjort litt julegåvehandling før halloween-arrangementet, og så ta nattoget heim igjen.
Men for eit par dagar sidan skjedde det ei tragisk ulukke rett sør for der eg bur. Eit ras førte til togavsporing. Alle tog vart innstilt på ubestemt tid. Området vart vurdert utrygt, så hovudvegen forbi der vart også stengt. Og det fæle vêret vi har på denne tida av året har ført til at begge omvegane har vore stengt fleire gonger sidan då. Å køyre nedover med bil var difor heller ikkje eit val.
Eg bestemte meg for å ta fly. Då fekk eg kortare tid i byen før arrangementet, og eg fekk det kjempetravelt etterpå. Begge flyavgangane mine vart nesten innstilt eller forseinka på grunn av vêret, så dette vart mildt sagt ein stressande tur.