Glossary

Terminologi, akronym, forkortingar, ord og frasar om kostymehobbyen, 501st Legion og Star Wars.

0-9

501st Legion (klubb): Verdsfemnande kostyme- og velgjerdsorganisasjon som kler seg ut som "dei slemme" i Star Wars. Klubben vart stifta i 1997.

501st Legion (fiksjonsregiment): Ein elitelegion av klonetropp-/stormtropp-soldatar under kommandoen til Darth Vader. Regimentet oppstod fyrst under Klonekrigen. Også kjent som 501st Clone Battalion og seinare "Vader's Fist".

Namnet vart skriven inn i Star Wars: The Clone Wars som ein referanse og takk til kostymeklubben 501st Legion. (Sjå: 501st Legion (klubb))

Aurebesh: Det galaktiske standardalfabetet i Star Wars-universet.

Andre kjente alfabet: Outer Rim Basic (ofte brukt til å transkribere huttisk), Futhark/Futhork (mest sett på Naboo), Høg-galaktisk (ser akkurat ut som det ekte, latinske alfabetet vårt).

Desse alfabeta har stort sett dei same bokstavane som i engelsk, så du kan eigentleg kalle dei ein skrifttype heller enn eit alfabet. Men det finst enkelte bokstavar som ikkje finst i engelsk.

Høg-galaktisk er ein retcon. (Sjå: retcon)

BH-: Trooper-ID-prefiks for dusørjegarkostyme.

BHG: Sjå: Bounty Hunter Guild.

Bounty Hunter Guild: Ei underavdeling av Legionen som spesialiserer seg på dusørjegarkostyme. Også kjent som The BHG. (Sjå: Detachment)

Bucket: Bøtte, slang for hjelm.

CRL: Sjå Costume Reference Library.

Celebration: Sjå: Star Wars Celebration.

Centurion: Tredje og høgste nivå av kostymedetalj-nøyaktigheit, som definert i Stormtrooper-CRL-en. Valfritt, ikkje påkravd for medlemskap. (Sjå: Costume Reference Library)

Challenge coin: Liten metallmedaljong/samlemynt (vanlegvis rundt 3-4 cm i diameter) med eit symbol, logo eller tekst. (Sjå: Merch.)

Con: Sjå: Convention.

Convention: Messe - eit organisert arrangement der fans samlar seg for å feire ei felles interesse. Det blir skipa panelordskifte, sniktitt på nytt innhald, møte med kjente personar i miljøet, kostymekonkurransar, med meir.

Cosplay: Kostymehobby. Dei som har dette som hobby, lagar og/eller bruker kostyme for å representere eller spele ein spesifikk rollefigur eller type rollefigurar, ofte frå filmar, spel eller bøker innan sjangrane fantasi og science ficiton.

Costume Reference Library: Eit dokument som skildrar eit kostyme og alle delane i det, samt krava Legionen stiller. Medlemer blir akseptert basert på om dei oppfyller krava i desse dokumenta. Dei inneheld også merknader om valfrie gradar av kostymedetalj-nøyaktigheit. Også kjent som CRL.

DZ-: Trooper-ID-prefiks for ulike innbyggjar-kostyme.

Detachment: Ikkje-administrativ undereining av Legionen. Eit forum og fellesskap som etterforskar og spesialiserer seg i ein spesifik kostymetype, som delar kunnskap og erfaringar og som hjelpar nye rekruttar med prosjekta sine. Eit medlem kan vere knytt til mange ulike detachment.

E-11: Laserrifle brukt av stormtrooperar. Også kjent som “BlasTech E-11 Standard Imperial Sidearm”.

Dette var ein filmrekvisitt basert på det britiske maskingeværet Sterling MK IV.

EE-3: Laserrifle brukt av Boba Fett. Også kjent som “BlasTech EE-3 Carbine Rifle”.

Dette var ein filmrekvisitt basert på signalpistolen Webley & Scott No. 1 Mark 1.

EIB: Sjå: Ekspertinfanteri.

Ekspertinfanteri: Andre nivå av kostymedetalj-nøyaktigheit, som definert i Stormtrooper-CRL-en. Valfritt, ikkje påkravd for medlemskap. EIB står for "Expert Infantery Badge" (Sjå: Costume Reference Library)

FISD: Sjå: First Imperial Stormtrooper Detachment.

Fire-team: Lokal, ikkje-offisiell undereining av ein Detachment, for troopers av same kostymetype i same område. (Sjå: Detachment)

First Imperial Stormtrooper Detachment: Forkortast som FISD. Ei undereining av Legionen som spesialiserer seg på stormtrooper-kostyma. (Sjå: Detachment)

GML: Garrison Membership Liaison, medlemskoordinator. Din kontaktperson når du søker medlemsskap i ein garnison.

Frå Wikipedia: «The GML is responsible for reviewing and processing applications for membership and maintaining Garrison member information in the Legion database. »

Garnison: Lokal eining av 501st Legion med minst 25 medlem. Det meste av aktiviteten i Legionen skjer lokalt, organisert av garnisonen i området. Store garnisonar kan vere inndelt i squads.

Greeblie: Ting som blir brukt som dekor på eller i eit kostyme eller rekvisitt utan å ha ein funksjon. Ein greeblie kan vere kva som helst, som knappar, kablar, springfjør frå ei penn, delar frå byggesett og så vidare. Greebliane sin einaste funksjon er å få gjenstanden til å sjå meir interessant ut. Omgrepet blir sagt å stamme frå George Lucas.

Infamous: Andre nivå av kostymedetalj-nøyaktigheit, som definert i Boba Fett-CRL-en. Valfritt, ikkje påkravd for medlemskap. (Sjå: Costume Reference Library)

K-11: Laserpistol brukt av Boba Fett. Også kjent som "Sacros K-11 Disintegrator Pistol".

Dette var ein filmrekvisitt basert på spydfiskepistolen Technisub Pulce 40.

Legion: Sjå: 501st Legion. Det kan også tyde Rebel Legion, men på denne nettstaden er det mest det fyrste.

Logo, bokstav (501st Legion): 501st Legion har to logovariantar. Bokstavlogoen har orda "501st Legion" i ein skrifttype som heiter "Vader's Fist". Nulltalet og bokstaven O har omrisset av ein stormtrooper.

Over "st" i "501st", i ein sans-serif-type, står det "Vader's fist".

Det er to utgåver av bokstavlogoen, ei bannerutgåve og ein firkanta utgåve med ordet "Legion" i litt mindre storleik og plassert nedanfor "501st".

Logo, sirkel (501st Legion): 501st Legion har to logovariantar. Sirkellogoen har ein stormtrooper med ei E-11-rifle framfor det imperiske tannhjulsymbolet. I aurebesh over trooperen står det "Vader's fist", og nedanfor står det "501st Legion".

Makerspace: Ein verkstad, ofte drifta frivillig, kor folk kan samlast for å dele verktøy og kunnskap innan mange ulike handverk og hobbyar. Døme: kostymebygging, ølbrygging, elektronikk, programmering.

Merch: Merchandise – profileringsartiklar og minnegjenstandar, ofte i avgrensa opplag og berre for medlem. Dette kan vere alt frå t-skjorter og putetrekk til broderte jakkemerke og pins.

Nidaros Imperial Squad: Tidlegare lokal undergruppe av Legionen i Trondheim. Dei var også kjent som Nidaros Imperial, og var ein del av tidlegare Nordic Garrison. (Sjå: Squad)

Nordic Garrison: Tidlegare lokal avdeling av 501st Legion i Danmark, Sverige, Finland og Noreg.

Danmark stifta Danish Garrison i 2017.

I 2022 gjekk Sverige og Finland ut kvar for seg for å stifta Swedish Garrison og Finnish Garrison.

Nordic Garrison vart til Norwegian Garrison i 2022. (Sjå: Garnison)

Norwegian Garrison: Den lokale avdelinga av 501st Legion i Noreg. Tidlegare kjent som Nordic Garrison. (Sjå: Garnison)

Outpost: Utpost, ei lokal avdeling av Legionen i område med for få troopers til å skipe ein garnison. Ein utpost treng minst éin medlem. (Sjå: Garnison)

RPG: Rollespel (role-playing game)

Retcon: Faktaopplysningar eller plottpoeng i eit nyare verk som justerer etablerte faktaopplysningar frå eldre verk, ofte fordi det nyare verket ikkje lenger samsvarer heilt med det eldre. Også kjent som "retroaktiv kontinuitet".

Døme: I Jediridderen vender tilbake, når Obi-Wan fortel Luke at hans tidlegare påstand i Stjernekrigen – at Vader drepte Anakin – var sant "frå eit visst synspunkt".

Frå WikiPedia: “…a literary device in which established diegetic ‘facts’ in the plot of a fictional work are adjusted, ignored, or contradicted by a subsequently published work which breaks continuity with the former”.

SL-: Trooper-ID-prefiks for eit sith-kostyme.

SWC: Sjå: Star Wars Celebration.

Screen-accurate: Filmlikt - Rekvisitt eller kostymedel laga for å sjå så likt ut som mogleg som i ein film.

Screen-used: Filmbrukt - Rekvisitt eller kostymedel som faktisk har blitt brukt i ein film.

Squad: Lokal undereining av ein garnison. Ein squad har minst 10 medlem, og opererer i eit avgrensa område innanfor territoriet til garnisonen. (Sjå: Garnison)

Star Wars Celebration: Den offisielle Star Wars-messa.

Messa skjer ikkje kvart år. Ho har tidlegare blitt arrangert i Denver (USA), Indianapolis (USA), Los Angeles (USA), London (England), Chiba (Japan), Orlando (USA), Essen (Tyskland), Anaheim (USA) og Chicago (USA).
(Sjå: Convention)

Supporter: Ein hjelpar utan kostyme eller i eit ikkje-restriktivt kostyme. Hjelparen fungerer som auga og øyra under ein troop, og passar på at trooparane (og alle rundt) er trygge. Blir også kalla handler, wrangler, squire, crew.

TDH: Sjå: The Dented Helmet.

TI-: Trooper-ID-prefiks for eit TIE-pilotkostyme.

TK-: Trooper-ID-prefiks for eit stormtrooperkostyme.

The Dented Helmet: Eit nettfellesskap som spesialiserer seg i Boba Fett og andre dusørjegarkostyme. Også kjent som TDH. The Dented Helmet er ikkje tilknytt 501st Legion.

Troop: Eit offisielt arrangement, organisert gjennom ein garnison, utpost eller gjennom Legionen sentralt.

Troopar: Ein medlem av 501st Legion. Medlemen kan ha kva som helst 501st-kostyme, ikkje berre stormtrooper-kostymet.

Trooper-ID: Unikt medlemsnummer i 501st Legion.

Trooper-ID-prefiksen fortel kva for kostymetype den trooperen har. Eg har lista opp dei mest brukte prefiksar på denne nettstaden her, men det finst mange fleire.

Trooper-ID-en min er 32700, og prefiksane mine er TK og BH.

Trooping: Å delta på eit offisielt 501st Legion-arrangement i godkjent drakt.